نصائح للمخطوبين

[حور العين]

من:الابنة / آية عبد الرحمن
نصائح للمخطوبين
من فترة قليلة أوي وأنا سمعت كمية رهيبة

من المشاكل زوجية..

ولو مش مشاكل واضحة فهي مشاكل مستخبية

مستنية لحظة الانفجار المناسبة..

ناس مش سعداء.. عايشين مع بعض..

فيه حاجة ناقصة.. بنحب بعض بس غرباء..

مشاكلنا تافهة وعلى أقل كلمة تقلب حرب.

قررت أسأل بنات متجوزة كتير من أصحابي،

حوالي 20 بنت..

أبعت لكل واحدة على حدة

"تنصحوا المخطوبين يتفقوا على إيه قبل الجواز

عشان ميقعوش في مشاكل؟"

وكل واحدة نصحت من قلبها،

والغريب إنهم اتفقوا على كام نقطة حبيت أجمعهم هنا..

تحت شعار

"كفاية نحنحة ويا ريت نتكلم جد شوية".

خلينا متفقين إن فترة الخطوبة المفروض

من أجمل الفترات اللي بتقضيها البنت في حياتها..

فترة الحب والكلام الحلو والهدايا..

ونغمض عينينا قبل ما ننام وإحنا مبتسمين بعد مكالمة جميلة..

طيب ممكن نتكلم شوية كلام جد

ونتفق على الحياة اللي جاية؟

عشان نرتاح ومنتكعبلش زي اللي سبقونا.

البنات بينصحوا المخطوبين بإيه؟

المصاريف

لازم نتفق فلوسنا هتروح فين وإزاي،

مين هيمسك المصروف.

اللي لسه مخطوبين بيكونوا لسه مسنودين

على أهلهم في حاجات كتير أقلها الأكل والشرب،

ليه منجربش يوم ننزل مع أهلنا نجيب خزين البيت

ونسأل الفواتير بكام وإحنا بنصرف لبس وفسح كام..

والمشكلة إن الولد بيفضل يوعد أنا هفسحك

وهظبطك وبعد الجواز الكل يتصدم بالواقع

والخنقة المادية تبتدي تظلل على البيت.

الشغل والدراسة

اتفقوا إنتي هتشتغلي أو تكملي دراستك بعد الجواز ولا لأ..

ولو فيه أولاد إيه شكل حياتكم..

ومش عيب إنك تكملي في شغلك

أو تسيبيه عشان خاطر بيتك..

المهم ده قراركم إنتوا وبس..

محدش له أي حق صوته يتسمع وسطكم.

ذمتك المالية

لو بتشتغلي من حقك إنك متساعديش في البيت،

وحلو منك برضو إنك تساعدي،

بس تبقي عارفة إنتي هتساعدي بقد إيه..

ولازم الراجل ميعتمدش على شغل مراته..

لأن ببساطة ممكن الست تسيب شغلها

في أي وقت لضعف

أو حمل أو احتياج من ولادها ليها..

ساعتها ممكن -لا قدر- الله الدنيا تبوظ..

فنصيحتنا ليكي ساعدي بحاجة مش ثابتة

وبتتغير كل شهر عشان ميخدش مساعدتك حق،

ولو قصرتي نبتدي في المشاكل.

مصاريف البيت دور الراجل وبلاش نلعب أدوار

بعض بطريقة تتعبنا قدام،

وحوشي من فلوسك للزمن.

زيارات الأهل

ليه منتفقش هنزور أهالينا كل قد إيه،

وهنبات عندهم ولا لأ،

وهنبات قد إيه. فيه ناس فعلاً حياتهم بتبوظ

من عدم النظام ويلاقوا إن الأسبوع بيضيع كله

عند أهاليهم وملهومش أي خصوصية.

والمغتربين..

لازم تتفقوا أجازتكم هتقضوها إزاي وفين،

ولو ملكمش بيت لسه يبقى تتفقوا كويس جدًا في النقط دي،

مع مراعاة لو الست حامل أو مريضة

ومحتاجة تقعد عند مامتها أكتر من حماتها

عادي طبعًا الدنيا سلسة.

ونصيحتنا ليكم: حاولوا تجيبوا ولو شقة صغيرة تقدروا

تنزلوا فيها أجازتكم عشان لو –لا قدر الله- كان

لازم ترجعوا بلادكم أو محتاجين

خصوصية مثلاً يكون بيتكم عندكم.

نظام اليوم

ممكن من باب الهزار نتكلم عن يومنا ماشي إزاي..

بيتفرج على كل الماتشات المحلية والدولية ولا لأ..

بينزل على القهوة كل قد إيه..

وإنتي بتصحي بدري ولا بتحبي تقضيها نوم للضهر..

بيتأخر في شغله أو بيسافر فترات طويلة كتير ولا لأ..

بيجي من الشغل يفضل ساكت وإنتي بتحبي الكلام ولا إيه..

أهالينا بيشتكوا مننا في إيه عشان تعرفي

هتوطي تلمي هدومه وشرباته من الأرض قد إيه.

الفسح

ليه منتفقش على نظام فسح،

بدل ما الستات يا عيني اللي مش بتشوف الشارع

غير عشان تزور مامتها أو حماتها وتتحسب عليها نزولة،

وإنتو ممكن تنزلوا مع أصحابكم كل قد إيه،

عشان فيه رجالة بيقطعوا البنات عن صاحباتهم

بعد الجواز وهو يقضيها نزول ويسيبها.

خطة للحياة

إنت إيه طموحك؟

وشايف نفسك وشايفنا إزاي بعد 5 سنين؟

هنعمل إيه؟

هنكبّر الشقة ولا هنحوّش لمدراس ولادنا إن شاء الله؟

نفسك تعمل مشروع ولا نسافر؟

وبجد ربنا ما يوقعكم في راجل معندوش طموح.

أهلنا

اتفقوا إنكم واثقين في بعض وساندين على بعض،

مش محتاجين حد يدخل في حياتنا ويفرض رأيه،

لازم هنحتاج نسمعلهم ونفضفض معاهم بس نسمع ونفكر ونقرر،

إحنا كبرنا،

ولو لسه شايفين إن لازم يكون علينا قوة عظمى بتحدد حياتنا..

طب نتجوز ليه؟