توفير الوقـت فى رمضان(العصائر)

[هيفولا]

توفير الوقـت فى رمضان
(العصائر)


بسم الله الرحمن الرحيم
السلام عليكم ورحمة الله وبركاته

بما ان رمضان قرب ومعظم السيدات بيتسرق منها رمضان فى المطبخ
وبتضيع وقت كبير مع الاسف
هاقولكم افكار بنعملها ولله الحمد قبل رمضان
مش هتخليكى تضيعى وقتك فى المطبخ وهتستمتعى بوقتك ف العبادة
جددوا النية ان هدفنا توفير وقتنا فى رمضان للعبادة

1- هتجيبى كل كمية البلح اللى عندك وتكسريه بايد الهون
وتشيلى النوى منه وتحتفظى بيه بحيث ما تضيعيش وقت فى تكسيره فى رمضان
-- انقعى على طووووول

2- التمر هندى : هاتى حلة وحطى فيها 3 لتر ماء
واغليها وبعدين حطى فيها لفة تمر هندى كبيرة وسيبيها تغلى شوية

التمر هندى هيبقى مركز جدا جدا ..
حطى عليه 2 كيس سكر و قلبى كويس السكر وهو لسة سخن
هيبقى عندك تمر هندى مركز جدا ومسكر جدا

هاتى قوالب التلج وصبى فيها التمر هندى بعد ما يبرد
وحطيها فى الفريزر هيتجمد طبعا .. طلعيها من الفريزر
http://up.hawahome.com/uploads/14334337532.jpg

ابدئى طلعى قوالب التمر هندى من قوالب التلج
هيبقى عندك مربعات التمر هندى المسكرة و المجمدة
http://up.hawahome.com/uploads/14334337533.jpg

حطى كل 5 قوالب فى كيس صغير او اكتر حسب ما تحبى .
.ورجعى الاكياس تانى فى الفريزر

لما تحبى تعملى عصير تمر طلعى الكيس اللى فيه خمس قوالب
وقلبيه فى لتر مية ساقعة هيبقى عندك احلى تمر فى 5 دقايق

http://up.hawahome.com/uploads/14334337531.jpg

3- الكركدية : هتعملى فيه زى ما عملتى فى التمر
لو مش حابة تعملي فى قوالب ممكن تحطي العصير المركز
فى اكياس صغيرة وعلى الفريزر على طول

اما السوبيا مش محتاجة تعمليها قوالب
لانها بتتعمل على طول ساعة الافطار

وما تنسوش تجددوا النية ان هدفنا توفير وقتنا فى رمضان للعبادة

منقول بتصرف

يتبع
هيفولا:o

[هيفولا]

توفير الوقـــت فى رمضان

(تحضير الافطار)


بسم الله الرحمن الرحيم
السلام عليكم ورحمة الله وبركاته
جددى نيتك انك بتوفرى وقتك للعبادة عشان تاخدى الثواب

من دلوقتى هنشترى الاتى :
( لحمة مفرومة -- لحمة عادية -- فراخ بانيه -
- صدور او وراك دجاج -مكسرات -- طماطم للتخزين)

**اللحمة المفرومة : هتقسميها
جزء هتعصجيه وتجهزيه فى علب او اكياس فى الديب فريزر
وجزء هتعمليه كفتة وتصبعيه فى الاطباق الفوم او الفويل
وجزء هتعمليه كبيبه شامى جاهزة على القلى مباشرة
الحاجات دى هتنفعك جدا خصوصا لو فيه عزومة

**البانيه : تبليه بالدقيق الاول وبعدين البيض وبعدين البقسماط
ورصيه فى الاطباق الفوم وجهزيه على القلى برضه فى الفريزر
( الطريقة دى ناجحة جدا )

**الصدور او الوراك : هتغسليها وتنظفيها بالملح والدقيق
والخل وبعدين تحشى تحت جلدها بالبصلة المتبلة وعلى الفريزر فورا
وما تخافيش البصل مش هيغير لو حطتيها فورا فى الفريزر

**المكسرات : هنستخدمها فى الارز الكبسة والحلويات
هتغلى ماية وتحطى فيها اللوز ربع ساعة وتقشريه وتشيليه مقشر فى التلاجة

البندق هتحمريه فى طاسة تيفال من غير زيت ولا سمن تحمير على الناشف
هتلاقى قشرته طلعت منه بسهوله احتفظى بيه فى التلاجة

عين الجمل شيليها زى ما هى مش بنعمل فيها حاجة

**الطماطم : قبل رمضان بتفرمىها وتصفيها وتغليها
وتحتفظى بيها جاهزة للطبيخ
** الثوم : قشريه ف برطمانات فى التلاجة او افرميه وحطيه فى كياس فى الفريزر

**اعملى كيسين تلاتة خلطة محشى جاهزة (بدون الارز طبعا ) وفى الفريزر...
ما تخافيش طعمه مش هيغير لو حطتيهم فورا بعد التجهيزمباشرة ..
يبقى المحشى يادوب تغسلى الرز وتضيفى عليه الخلطة بس

** ورق العنب والكرنب : جهزيه متقطع جاهز فى اطباق فوم برضه

وما تنسوش تجددوا النية اننا بنوفر وقتنا لرمضان
عشان العبادة والدعاء على الظالمين واعوانهم


منقول بتصرف

يتبع

هيفولا

[هيفولا]

توفير الوقـت في رمضان
(الحلويات)


بسم الله الرحمن الرحيم

السلام عليكم ورحمة الله وبركاته

جددو النية اننا عايزين نوفر وقتنا للعبادة والدعاء
وخصوصا الدعاء لنصرة المظلومين والدعاء على الظالمين

1- الشيرة : هاتى 3 كيلو سكر واعمليهم عسل للقطايف
والكنافة وحطيهم فى برطمانات فى الثلاجة بيقعد وبيتقل فى التلاجة وبيبقى تحفة

2- القطايف : اعمليها من النهاردة وتحشيها بالمكسرات
وتقفليها كويس وتحطيها فى اطباق فوم وتقفليها بالبلاستيك فيلم وعلى الفريزر

اعملى لك كذا طبق يكفوا الشهر كله

لما تحبى تعملى قطايف فى رمضان طلعى الطبق من الفريزر
واقليها على طول هيبقى عندك قطايف فى ثوانى (مدة الاعداد ربع ساعة )

3 - الكنافة : حمريها تحمير خفيف فى السمن يبقى لونها اصفر دهبى
وحطيها فى اكياس كل كيس فيه كنافة تكفى صينية

ولما تحبى تعملى كنافة فى رمضان طلعى الكيس
وحطى نص الكنافة ف الصينية المدهونة
وفوقها المكسرات او الكستر او القشطة بالمانجة وحطى النص التانى
فوقهم وع الفرن وطلعى العسل اللى انتى جهزتيه فى التلاجة
واسقى بيه الكنافة وهى طالعة من الفرن
( مدة الاعداد ربع ساعة فى الفرن)

4- بلح الشام : هتعمليه قبل رمضان برضه

بعد ما تشكلى بلح الشام بالقمع بتاعه حطي صوابع بلح الشام
فى صينية مفرودة فى الفريزر

طلعيه من الفريزر هتلاقيه متجمد ...
حطيه فى كيس نايلون مش هيلزق فى بعض لانه متجمد

لما تحبى تقليه طلعيه من الفريزر على الزيت مباشرة

وطبعا انتوا عارفين ان بلح الشام مش بيتقلى فى زيت ساخن
عشان ينفش كويس (مدة الاعداد نص ساعة )

تقدرى تعملى صوابع زينب بنفس الطريقة

شوفتى ازاى بقى الحلويات هتتعمل فى ربع ساعة او نص ساعة بالكتير

منقول بتصرف