المستشار نبيل جلهوم | ||
المهندس عبدالدائم الكحيل | الدكتور عبدالله بن مراد العطرجى | بطاقات عطاء الخير |
دروس اليوم | أحاديث اليوم | بطاقات لفلي سمايل |
|
تسجيل دخول اداري فقط |
سفرة عطاء الخير 1435 سفرة غير بإعداد وأشراف / هيفولا |
انشر الموضوع |
|
أدوات الموضوع | انواع عرض الموضوع |
#1
|
|||
|
|||
حلويات العيد 1435 (3)
حلويات العيد 1435 (3) 1-البتيفور الناعم بكيس التزيين البتيفور بكيس التزيين بيختلف عن اللى بيتعمل بماكينة البتيفور البتيفور اللى بكيس التزيين لازم العجينة تبقى خفيفة وناعمة عشان تنزل من الكيس بسهولة ومتغلبناش لكن ماكينة البتيفور تتحمل اى عجينة ناعمة او قاسية خفيفة او تقيلة المكونات: 4 كوب دقيق 2 كوب زبدة طرية 3 بيضات كوب وربع سكر بودرة=فانيليا 2 ملعقة صغيرة كاكاو للتلوين الطريقة: فى اناء هنحط الزبدة ونضربها بالمضرب لغاية مايبقى لونها ابيض ونضيف لها السكر بودرة ونضربهم بالمضرب ونضيف لهم البيض والفانيليا ونضربهم لغاية مايختفى البيض واخر حاجة نضيف لهم الدقيق المنخول ونقلب المكونات بالمعلقة او نعجن بايدينا لغاية ماتمتزج وهنلاقى العجينة لينة وبتلصق فى الايد ممكن نشتغل بيها على طول وممكن نحطها شوية فى التلاجة حسب رغبتكم وناخد نص كمية العجينة نضيف لها الكاكاو عشان نلونها ونعجنها لغاية ماتتكون كلها وفيه ناس بتحب تحط بيكنج بودر لمكونات البتيفور انا جربت الطريقتين واخترت اللى من غير بيكنج بودر هش وشكله مش بيتغير فى الفرن وطبعا انتم اختاروا اللى يريحكم وهنحط العجينة فى كيس التزيين عشان نشكل البتيفور ودى شكل البلبلة اللى استخدمتها ونشكل البتيفور على ورق خبز وصوانى مدهونة وفيه ناس ممكن تقول كتير 2 كوب زبدة على اربع كوبايات دقيق احنا قلنا فى الاول البتيفور ده ناعم ورغم كده فيه ناس بتكتر الزبدة عن 2 كوب لو هتعمل اربع كوبايات دقيق والابيض زينته بجزء من الكاكاو والكاكاو زينته بجزء من الابيض والتزيين ده حسب رغبتكم مثلا فيه ناس بتحب تحط كريز وهندخله فرن حرارته متوسطة لغاية مايستوى يحمر من تحت بس ومن فوق يفضل لونه زى ماهو هيبقى لون الضهر زى كده وده شكله بعد ماخرج من الفرن طلع ناعم وهش مش محتاج يتلصق بالمربى بس لو عايزين تلصقوه ده حسب رغبتكم تابعوني هيفولا
التعديل الأخير تم بواسطة هيفولا ; 07-30-2014 الساعة 08:07 AM |
#2
|
|||
|
|||
حلويات العيد1435 (3)-2-
-2-
البيتيفور - بالماكينة المكونات (المكونات دى لماكينة البتيفور مش لكيس التزيين) كيلو دقيق 4 كوب زبدة طرية 3 كوب سكر بودرة 5 بيضات كبار 2 ملعقة صغيرة فانيليا ملعقة كبيرة كاكاو للتلوين وللتزيين هنحتاج: مربى(اى نوع انا استخدمت مربى المشمش) فارمسيل-جوز هند فستق مجروش-بندق مجروش (وطبعا التزيين ده حسب الرغبة) الطريقة: فى اناء هنحط الزبدة وهنضربها بالمضرب لمدة نص دقيقة وهنضيف لها السكر بودرة ونضربها بالمضرب مدة طويلة لغاية مالونها يبقى ابيض وقوامها كريمى ونضيف لهم البيض والفانيليا ونضربهم كويس ونضيف لهم الدقيق المنخول بالتدريج ونقلب المكونات بالمعلقة او نعجن بايدينا لغاية مايبقى عندنا عجينة متماسكة وناخد نص كمية العجينة نضيف لها معلقة الكاكاو ونعجنها بايدينا لغاية ماتتلون كلها وطبعا فيه ناس بتحب تحط بيكنج بودر لمكونات البتيفور انا جربت الطريقتين واخترت اللى من غير بيكنج بودر هش وشكله مش بيتغير فى الفرن وطبعا انتم اختاروا اللى يريحكم ونبدأ نشكل البتيفور بالماكينة فى صوانى مدهونة وعملت ابيض وكاكاو وشكل جديد كاكاو وابيض مع بعض هندخله فرن حرارته متوسطة لغاية مايستوى يحمر من تحت بس ومن فوق يفضل لونه زى ماهو هنطلعه من الفرن ونسيبه يبرد خالص ونبدأ نجهز الحشو والتزيين هناخد قطعة بتيفور ونغمس ظهرها فى المربى ونلصقها فى قطعة تانيه نفس شكلها وحجمها ونغمس طرفهم فى المربى ونحط الطرف ده فى المكسرات او جوز الهند او الفارمسيل (انا كاتبة التفاصيل المملة عشان المبتدئات) ونقدمه دى طريقة من الطرق الكتير للبتيفور انتم اختاروا الاسهل بالنسبه لكم تابعوني هيفولا |
#3
|
|||
|
|||
حلويات العيد1435 (3)-3-
3-الغريبة الناعمة ..
المكونات: 3 كوب دقيق 2 كوب سمنة بلدى (استخدمت سمنة الحلوب وبتكون فى حرارة الغرفة ولو طالعة من التلاجة بردو ممكن نشتغل بيها مفيش مشاكل) كوب سكر بودرة وللتزيين: لولى فضى الطريقة: فى اناء هنحط السمنة والسكر بودرة وهنضربهم بالمضرب الكهربائى لمدة 5 دقايق او اكتر لغاية مايدوب السكر فى السمنة والسمنة يبقى لونها ابيض وقوامها كريمى ويتضاعف حجمها ونضيفلهم الدقيق بالتدريج ونلم العجينة بايدينا والعجينة لازم تبقى طرية وكتلة واحدة يعنى لو اخدتى قطعة تكوريها ولقتيها اتفرتت منك تبقى العجينة ناشفة وانتى زودتى الدقيق ووقتها لازم تزودلها سمنة عشان تبقى طرية وتتشكل معاكى بسهولة وطبعا الغريبة الصح مفيهاش بيكنج بودر ولا نشا ولا بيض(الطريقة الاورجينال) والاحسن تتعمل بسمنة مش بزبدة عشان تبقى انعم هنبدأ نشكلها هناخد قطعة نكورها ولازم تفضل فترة فى ايدك ده بيخليها متماسكة لما تدخل الفرن ومتتشققش يعنى تعجنيها فى ايدك ونرصها فى صينية على ورق خبز ونضغط عليها باللولى الفضى وندخلها فرن حرارته متوسطة لغاية ماتستوى وهى مش بتقعد كتير فى الفرن لو قعدت كتير هتقرمش ومش هتبقى بالنعومية المطلوبة بس لازم تطلع من الفرن لونها ابيض فهنختبر سواها كل شوية ولما تلاقوا ظهرها بقى لونه وردى زى كده طلعوها من الفرن وده شكلها بعد ماخرجت من الفرن طعمها احلى من غريبة المحلات ناعمة جدا وبتدوب فى الفم تابعوني هيفولا |
#4
|
|||
|
|||
حلويات العيد1435 (3)-4-
4-كحك(كعك) العيد بالملبن
على الطريقة المصرية المكونات: كيلو دقيق نصف كيلو سمنة بلدى سايحة(انا استخدمت سمنة الحلوب) كوب ونصف ماء دافىء (ممكن استبداله بحليب) نصف ملعقة كبيرة خميرة فورية 2 ملعقة كبيرة سكر 5 ملعقة كبيرة سمسم مش محمص ملعقة كبيرة ريحة كحك (وريحة الكحك دى من المكونات الاساسية للكحك المصرى وهى عبارة عن خلطة بهارات مكونة من حبهان وقرنفل وجنزبيل وقرفة وشمر مطحونين واحنا بنشتريها جاهزة من عند العطار) مكونات الحشو: نصف كيلو ملبن(الملبن نفسه هو الراحة ) 2 ملعقة كبيرة سمنة 3 ملعقة كبيرة سمسم نقطتين ماء زهر الطريقة: هنبدأ فى تحضير عجينة الكحك ودى صورة ريحة الكحك للى ميعرفهاش فى اناء هنحط الدقيق ومعاه ريحة الكحك ونقلبهم ونعمل حفرة فى النص نحط فيها السمسم ونقدح السمنة وننزلها على الدقيق وهتعمل فوران لأنها لازم تكون بتغلى وطبعا غليانها ده هيخلى السمسم يتحمص وفيه ناس بتحط السمنة باردة من غير ماتقدحها بس انا بعمل الكحك بالطريقة المصرية التقليدية طريقة جدتى الله يرحمها ونقلب الدقيق مع السمنة كويس بالمعلقة لأن السمنة سخنة يعنى نبس العجينة زى مابنقول فى مصر لغاية ماالدقيق يشرب كل كمية السمنة ونسيبهم يبردوا خالص وفى الكوب ونص ميه هندوب الخميرة والسكر وننزل بيهم على الدقيق والسمنة ونبدأ نعجن بايدينا او بالمعلقة ونلم العجينة بايدينا ونغلفها ونسيبها تخمر فى مكان دافى من مدة ساعة لساعة ونص وفى الوقت ده هنجهز حشوة الملبن هنقدح السمنة على النار ونطفى النار ونحط السمسم يتحمص فى السمنة على السخونية ونقلبه ونقطع الملبن قطع ونحطه على السمنة والسمسم ونشغل النار ونقلبهم كويس لغاية ماالملبن يمتزج مع السمنة والسمسم ويبقوا كتلة واحدة واخر حاجة نضيفلهم ماء الزهر وطبعا الخطوة دى اختيارى نرجع لعجينة الكحك هنلاقيها اختمرت كويس هناخد جزء من العجينة نكوره ونعمل حفرة فى النص ونكون مكورين الملبن ومجهزينه للحشو ونحط فى الحفرة دى كورة من كور الملبن ونقفل العجينة ونكون محضرين فورم تشكيل الكحك او المناقيش نحط العجينة فى الفورمة ونضغط عليها وننزلها من الفورمة على صينية مدهونة ونرص الكحك فى صوانى مدهونة سمنة وندخل الكحك فرن حرارته عالية ومسخنينه قبل كده ونطلعه لما وشه يحمر ويستوى وفيه ناس بتسيبه يختمر بعد ماتحطه فى الصوانى بس ده هيغير شكل الكحك والنقشة بتاعته هتختفى ولما يبرد خااااااااااااااالص نرش عليه السكر بودرة ونقدمه وده شكله بعد التقديم وده شكل الملبن جوة الكحك الكحك طلع طعمه اكثر من رائع بس ناعم جدا ودسم لأننا بنحبه كده لو انتم عاوزينه اخف ممكن تستبدلوا السمنة بزبدة |
#5
|
|||
|
|||
حلويات العيد1435 (3)-5-
5-بسكويت اللانكشير المكونات: 3 الا ربع كوب دقيق 2 ونصف كوب نشا كوب ونصف زبدة طرية=كوب وتلت سكر بودرة 2 بيضة-فانيليا-ملعقة صغيرة بيكنج بودر للتزيين: شوكولاته سايحة مربى مشمش(او اى نوع مربى) فستق مطحون-بندق مطحون جوزهند-فارمسيل شوكولاته (والتزيين طبعا حسب الرغبة) الطريقة: فى اناء هنحط الزبدة ونضربها لمدة نص دقيقة ونضيف لها السكر بودرة ونضربهم كويس لغاية ماالزبدة يبقى لونها ابيض ونضيف لهم البيض والفانيليا ونضربهم كويس جدا لمدة 5 دقايق متواصل ونضيف لهم الدقيق والبيكنج بودر والنشا بعد ماننخلهم ونقلب المكونات بايدينا او بالمعلقة لغاية ماتمتزج وهنلاقى العجينة بتلصق فى الايد شوية نغلفها ونحطها فى التلاجة لمدة نص ساعة قبل مانشتغل بيها ونكورها ونحطها فى صينية مدهونة ونحاول نخلى الكور كلها فى حجم واحد وهنعمل حجم صغير وحجم كبير هندخله فرن متوسط الحرارة لغاية مايستوى وهو مش بياخد وقت طويل فى الفرن بيستوى بسرعة واللانكشير بيبقى لونه ابيض بعد مايطلع من الفرن من فوق ومن تحت زى كده هنسيبه يبرد خالص ونحضر حاجة التزيين هنحط ضهر اللانكشير فى المربى ونلصقها فى واحدة تانيه ونحط طرفهم فى اى مكسرات مطحونة او جوزهند او فارمسيل واللى عملناهم حجمهم كبير هنغرقهم شوكولاته سايحة وده شكله بعد التزيين وغير ان شكله حلو طالع ناعم وهش تابعوني هيفولا |
#6
|
|||
|
|||
حلويات العيد1435 (3)-6-
6-بسكويت لانكشير (2) المكوّنات طريقة العمل
نصائح يفضّل ترك العجينة ترتاح في التلاجه مدة 10 دقائق. 1- في وعاء، أخلطي الدقيق والنشاء والبايكنغ باودر واتركي الوعاء جانباً. 2- ضعي في وعاء الخلاط الكهربائي الزبدة والبيض والسكر والفانيليا واخلطي جيداً حتى تتجانس المكوّنات. 3- أضيفي خليط الدقيق تدريجياً مع الخلط المستمر حتى تحصلي على عجينة متماسكة. 4- غطّي الوعاء ثمّ أدخليه إلى الثلاجة لـ10 دقائق. 5- شكّلي العجينة على شكل كرات متوسّطة الحجم وصفّيها في صينية فرن. 6- أدخلي الصينية إلى فرن محمّى مسبقاً على حرارة 180 درجة مئوية. 7- إخبزي الكرات لـ10 دقائق ثمّ أخرجي الصينية من الفرن واتركيها جانباً حتى تبرد. 8- ضعي القليل من الحشوة التي اخترتها على قطعة بسكويت والصقي قطعةً أخرى عليها. 9- أعيدي الكرة حتى انتهاء الكمية. 10- زيّني الأطراف إما بجوز الهند أو بالفستق الحلبي المجروش. صحة وهناء يا رب. هيفولا |
|
|