[هيفولا]

عيدكم مباااارك
ويا رب دايما عامر بالاعياد والافراح
ورضا من الله وبركة
حبايبى دايما بتوحشونى وبفكر لكم فى احلى اطباق عشان ارجع بيها

والنهاردة حبيت اعيد عليكم بطبق كله بيحبه

اللازانيا الأصلية


حبيت اقدمها بالطريقة الاصلية القديمة
بتاعت الطلاينة لانها فعلا بتكون روعة

والطريقة دى موحدة على كل حاجة عندى ..

علبة المكرونة وعلبة الجبنة وعلبة الصلصة




المكونات لصينية كبيرة

4 اكواب جبنة ريكوتا
2 بيضة
كوب جبنة برمجان او رومى مبشورة
2 كوب موتزريللا
ريحان او بقدونس
4 اكواب طماطم متسبكة
2 كوب عصاج
وطبعا المكرونة

الطريقة
اولا للى معندهومش علبة اللازانيا جاهزة ممكن تعملوها فى البيت

اولا لتجهيز حشوة الجبنة
نخلط الجبنة الريكوتا كلها على كوب واحد موتزريللا مبشورة
على نص كوب برمجان او رومى مبشورة مع بيضتين
وريحان مفروم او بقدونس لو الريحان مش متوفر



نخلط كويس لحد ما يندمجو ا



ثانيا حشو اللحمة

لعمل الطماطم
بتضربيها فى الخلاط وتخلليهم خشنة بسيط
ومعاها توم وريحان ونعناع وفلفل احمر
و تنزليه على زيت سخن لحد ما تتقل

العصاج بتعمليه عادى
وبعدين تضيفى ليه نص كمية الطماطم بس



ندخل على الرصة
انا استعملت المكرونة مش غير ما اسلقها وطلعت مستوية وجميلة
فا ماتخافيش منها المهم كمية السوايل فى الحشو هتسويها كويس

اولا حطيت نص كمية الطماطم السادة من تحت فى الصينية
عشان تبقى قاعدة للمكرونة
ورصيت المكرونة عليها

بعدين فردت نص خلطة الجبنة
وفوقها نص كمية العصاج بالطماطم
رصيت طبقة مكرونة
وكده الدور الاول جاهز




دى صور الدور الاول
الدور التانى بنفس الطريقة
طبقة من النص التانى من الجبنة
وعليها طبقة من الجزء اللى فاضل فى العصاج
وبعدين رصة تالتة و اخيرة من المكرونة
شوفوا الصور
وبعدين هقولكم على الوش



تغطية الوش

لازم تدلعيها على الوش
تاخدى اللى فاضل من الطماطم السادة وتفرديها على الوش
بعدين ترشيها باللى فاضل من الموتزريللا
وترصى ورق الريحان الفريش
بعدين ترشيها بحبة برمجان او رومى مبشور
وتختمى بشوية زيت زيتون او اى نوع



هنغطيها بفويل وندخلها الفرن متوسط حوالى 45 دقيقة
بعدين هما بيقولوا نشيل الغطى ونسيبها كمان عشر دقايق .
. بس انا بقولك لا
كفاية كدة عشان ما تنشفش وتعرفى تقطعيهاكويس
وطبعا لازم تتساب شوية عشان تمسك نفسها
ولو انى غرفتها على طول عشان كنت مستعجلة وكانت حكاااااية

وعلى فكرة بردو تانى يوم لما بتسخنيها بتكون وهم

ودى كانت النتيجة
ان ان اااااان



حبة صور احترافية



والزووووووم من جنب الشوكة على طول

غمضى عينك واتخيلى نفسك فى اقدم مطاعم نابولى وروما



الف هنا وعافية

هيفولا