سعودية تكتب مقال رائع قمة في المنطق..اقرؤوه

[هيفولا]

سعودية تكتب مقال رائع
في قمة المنطق..اقرؤوه


(انقل لكم مقال رائع بكل معنى الكلمة
طويل ... لكنه اروع مقال قراته بصراحة
اتمنى كل واحد/ة تقرأه بهدوء)

تقول الكاتبة

هذا أول موضوع لي هنا
ومتفائلة أنه يتثبت ويلاقي صدى حلو

ندخل في الموضوع.. وراح أتكلم بعفوية وتلقائية
لأن الكلام اللي يطلع من القلب مباشرة يدخل القلب

أنا بنوتة عمري 23
تغيبت عن مجتمعنا السعودي 8 سنوات ورجعت له من شهرين

بصراحة تفاجأت وانصدمت من التغيرات اللي حاصلة
في المجتمع بكل فئاته وطبقاته .. في النوادي الرياضية..في الأسواق..
والأهم في الجامعات والمدارس..وفي المنتديات والمدونات

تمنيت أني ألقى المجتمع تطور للأمام..أو تقدم للأفضل
لكني للأسف لقيت النقيض
رجوع خطوااات للخلف..من جميع النواحي

قد يكون كلامي فيه غلظة شوي
بس يقول لك المثل
يا بخت من بكاني وبكى الناس علي
ولا من ضحكني وضحك الناس علي

http://www.kleej.com/vb/mwaextraedit4/extra/32.gif


تساؤلات كثيرة أرددها بيني وبين نفسي وما ألقى لها أي جواب
وأنا متأكدة أنها تتردد على كل رزين وعاقل شرواكم

هل لما زادت رفاهية الحياة يزداد تخلفنا؟؟
هل لما تطورالعلم وتسهلت الطرق له يزداد جهلنا؟؟
ليه صرنا مجتمع سطحي؟؟

لا هم .. ولا رؤية .. ولا رسالة .. ولا هدف من الحياة
التفكير والتركيز على المنظر والمظهر


فيه كاريكاتير أول ما شفته زعلت
لكن ألحين حسيت إنه أبلغ من كتب ممكن نكتبها
الكاريكاتير يمثل شعوب العالم
فمثل الشعب السعودي
بكرتونات مزينة وإذا فتحتيها لقيتيها فاضية

وهذا واقع البنات اليوم مظهر ومنظر
ولو تقولين لها 1 ×1 كم؟..تنّحت

لو تقولين لها وش آخر كتاب قريتيه؟ ..قالت هااااه
"بغض النظر عن الروايات التافهة اللي طايحين فيها هالفترة"

لو نص هوس المظاهر هذا كان على عقولنا لكنـّـا أنجح الشعوب
لأنه ببساطة كل شيء متوفر عندنا
لا ناقصنا مال ولا قدرات عقلية

الأجانب فلوسهم رايحة على تعليم عيالهم وتثقيفهم وصحتهم

تلقين راتب الأب والأم ضئيل ومستحملين شظف العيش
عشان يرسلون ولدهم برى يدرس شهادة عليها القيمة

بينما عندنا يستحملون الديون والأقساط عشان تسوي زواج كله إسراف وتبذير
وآخرته الناس طالعة منتقدة

وإلا ديون وأقساط عشان تقول صيفنا بره شهر كامل

والله أعرف وحدة شخصيا تقول السفر بالنسبة لي عذاب لأننا إذا سافرنا
طول السفر طقاق أنا وزوجي وأنا أحرسه لا تناظر وهو يحرسني لا تناظرين .
.قلت طيب خلوا سفركم لبلدان محافظة أو لا تسافرون
حطوا فلوسكم في البيت تغيير ديكورات وأثاث

عصصصبت.. قالت خيييير ..سلايفي لين سولفوا. أصير بينهم ما سافرت
وإلا إذا سولفوا صديقاتي إلا أنا ما سافرت وش بيقولون عني!!!!!!!

مافيه تعليق

http://www.kleej.com/vb/mwaextraedit4/extra/23.gif

انا لما جيت بعد هذي المدة توظفت في بنك
ولاحظت إنه إذا جت العميلة أم ساعة ألماس فخمة وشنطة قوتشي الكل يتبادر لخدمتها

وإذا جت العميلة اللي مظهرها ما فيه بهرجة.. تستجدي الموظفات يجون يساعدونها

والمضحك في الوضع إني ألاقي العميلة البسيطة ما شاء الله حسابها شي وشويات..
وهذي أم البهرجة حسابها بالسالب(عليها قروض وسيارات تقسيط)..
وعنوانها يا إما شقة وإلا أجار

مو انتقادي على القرض ولا على السكن

انتقادي هو إنك مكلفة نفسك بالديون والقروض
عشان شويتين نظرة إعجاب من الناس
بس ما ألومك لكن ألوم المجتمع اللي صار سطحي..
يحكم عليك بموديل جزمتك


http://www.kleej.com/vb/mwaextraedit4/extra/32.gif

أول تصنيفنا للمجتمع كان
جامعية
مثقفة
عاقلة
متربية
قليلة أدب
دينة
بنت ما ربوها أهلها

يعني كان مقياسنا
الدين والتعليم والتربية

أما ألحين
صار تقسيمنا للمجتمع
لو كلاس
هاي كلاس
بنت ستايل
بنت قروية

فعلا تصنيف متخلف رجعي سطحي
يعني رجعنا للجاهلية

وإحنا ألحين ننادي بالعولمة والعالمية والتطور والتحضر
الحضارة تبدأ بالعقول

http://www.kleej.com/vb/mwaextraedit4/extra/32.gif

من جد من كثر ما أنا منهارة من هالوضع والله مو عارفة وش أكتب

أروح لنادي رياضي ألاقي ملابس يستحي إبليس يلبسها

طبعا هذا غير الاسترتشات اللي لما تتمدد يطلع البنطلون شفاف..شيء يجيب الغثيان..
المشكلة نتدرب في كلاسات كلها مرايا يعني ماتستائين من منظرك!!!!!

المشكلة إن زمان كان هذا الشيء
نكرة + قلة تربية + قلة دين
أما ألحين
عادي وكنه العيد


http://www.kleej.com/vb/mwaextraedit4/extra/32.gif

يتبع

[هيفولا]

تابع - سعودية تكتب مقال رائع قمة في المنطق
(2)

من أسبوعين اتصلت وحدة سعودية على دكتورة مقدمة برنامج تلفزيوني مشهور
قالت
أنا معلمة كلمت واحد وحبيته
وقال..و..و..وكملت تفاصيل حماقتها ..
اللي من جد فشيلة على القنوات ينقال أنه هذي سعودية

قالت لها الدكتورة
"..وش هالخداج معلمة وهذا عقلج..
أي جيل بتخرجين لنا..وين مخج..وين تربيتج "
الخداج: هو الجنين في بطن أمه إذا تعدى الشهر الخامس

يعني تعدينا مرحلة أنهم رجعوا للمراهقة.. هم رجعوا لما دون ذلك

http://www.kleej.com/vb/mwaextraedit4/extra/08.gif



أخذت اللغة على يد أمريكية..
عاشت في أمريكا 10 سنوات من زواجها و3 سنوات في السعودية..
لأنها متزوجة سعودي
تقول أنا توقعت السعودية بتسهل علي تربية عيالي لكن اكتشفت العكس

بره لما يشوفون غلط أقول لهم هم كفار ينبسطون شوي وآخرتها النار

بس إحنا مسلمين ننحرم شوي وبنتمتع فورإيفر في الجنة

تقول وكانوا مقتنعين والأمور تمام


أما هنا لما يسألوني عن أشياء غلط يشوفوها في الفيصلية"والله كلامها نصا"
أتلعثم وما ألاقي حجة مقنعة طبعا هم يعرفون كيف يحاورون عيالهم

ما تقول له إلا كلام مقنع ومنطقي شوفي مخ عيالهم ومخ عيالنا

نرجع لها تقول صرت أقول لهم
"there are good muslims & bad muslims"

http://www.kleej.com/vb/mwaextraedit4/extra/33.gif

فيه صرح رائع في عالم المنتديات اسمه مملكة المرأة
99% من مواضيعه عن المظاهروالشكل


*هل عالم المرأة في قطعتين الملابس اللي تلبسها؟؟
لا وكل مالها تتقلص هذي القطعتين

*وين ثقافة المرأة؟
*وين أساليب الحوار؟؟
*وين القضايا الدينية اللي تخص المرآة؟؟

يا كثر ما نسمع

ماتوقعت الزواج كذا ؟
انصدمت بالحياة اليومية في الزواج؟

ما قدرت أفهم زوجي.....

عارفين ليه لأن منتدياتنا النسائيةثقافتها

"بسررررعة بنات وين ألقى .... أحمر ..
عشاني بألبس في الحفلة لوو ويست"

وإلا
"مين أفضل مركز ينظف لي ... بالليزر؟؟"

صارت منطقة العورة .. منطقة عادي تطلع؟
منظر مقزز ومقرف.. وبدون ولا نقطة حياء؟؟

والله لو أمك اللي بتشيل لك بالليزر كان استحيتي
وين الحياء؟؟
مات؟؟
وإلا نخنقه عشان ما يسيطر على تصرفاتنا؟؟

وإلا اللي كان ماسك البنات شدة الأهالي؟؟
لما خفت شفنا الهوايل؟؟

وإلا الدين انحصر في صيام 30 يوم في السنة و5 صلوات في اليوم بس؟


http://www.kleej.com/vb/mwaextraedit4/extra/27.gif

كلها 8 سنوات تفاجأت وانصدمت
وما أدري متى أقدر أستوعب هذي التغيرات
اللي أتمنى تتعدل للأفضل ولا أحتاج أستوعبها

أتمنى أنها تكون نزوة وقريب تتلاشى وتصير ذكرى أليمة في الماضي ونقول كنا وكان

أتمنى يصير الخطأ شيء عيب ما نتفاخر به ونعتبره مقياس على مدى حضارتنا

ليه صرنا نستحي من الدين ومن العادات

"أنا أتكلم عن العادات الصح مو المتخلفة"

تجي كوافيرا تقول لو ما عندك تحفظ على الإكستينشن أعمليها !!

-صارت المسألة تحفظ؟
-صار اللعن أمر قابل للنقاش والتحفظ؟
-صار الوصل ينصح به في المنتدى على مسمع من مايزيد عن 500 بنت
وياليت وحده ردت وقالت حراااام


من واقعنا الكوافيرات أغلبهم نصرانيات عقيدتها المسيح ابن الله
بس الشرهة علينا إحنا يا أمة لا إله إلا الله

لو ما كانت شايفة جرأتنا وتمردنا على الدين ما قالت كذا

http://www.kleej.com/vb/mwaextraedit4/extra/06.gif

-هل كان التوصيل قبل عيني عينك يكتب في بروشور الصالون؟؟
جنب السشوار والتسريحة..

http://www.kleej.com/vb/mwaextraedit4/extra/06.gif


-لو أقدم لك كريم وأقول لك لو ما عندك تحفظ على السرطان جربيه تراه يبيض
وش ردة فعلك؟

فيه ردة فعل غير إنك ترمينه علي..وتنبهين قرايبك منه ..
وتحذرين البنات في المنتديات

http://www.kleej.com/vb/mwaextraedit4/extra/32.gif



وحفلات التخرج وحفلات النجاح والدي جيهات والزواجات

كلها معازف وأنواع التفنن موسيقى وعود وأورج
وإلى آخر الليل وإلى الثلث الأخير..
وعادي ..
ما فيه اللي يقول للغلطان تراك تماديت بالغلط

آخر الليل إذا ربي تفضل علينا ونزل لسمانا الدنيا
هل من داعي؟ هل من مستغفر؟ هل من تائب؟

عذرا يا رب إحنا مشغولين مع محمد عبده وأحلام

دوروا الدنيا بكل أبعادها
هل فيه ملك ينزل لك كل ليلة ويقول لك " تبين شي؟ "
أتفه ملوك الدنيا تلقين عنده 10 سكرتارية وبينك وبينه 10 أبواب
والدخول عليه بموعد إن كان يتنزل يقابلك من الأساس
أعجبتني عبارة لداعية مصري قال:
" ربنا ينزل كل يوم ينادي حد عايز حاقة..
وإحنا مشغولين عنه.."

تجيك الوحدة تشتكي وقراتها هنا في المملكة

تقول ياربي أنا كنت أكلم واحد وحبيته
ولما تزوجت ما حبيت زوجي وتحملت قلة حبي له
وبعد كذا اكتشفت إنه يكلم وحده وانهارت أعصابي
طيب.. وين الغريب في الموضوع

يعني قمة الخبث والخيانة
خنت أهلك وربك وتبين واحد طاهر.. نظيف...
قلبه عذري ..مافي حياته إلا أنت
وأنت في حياتك عشرة قبله

عجب !!!

http://www.kleej.com/vb/mwaextraedit4/extra/32.gif

هذا غير الصور الشخصية وعبارات
وصورالتوقيعات اللي كلها إيحاءات سيئة وسخيفة
وفيديوهات التوقيعات هذي لها نصيب الأسد في السوء

إحنا أرقى من كذا

http://www.kleej.com/vb/mwaextraedit4/extra/32.gif

أبصم بالعشرة أن كل قارئات موضوعي هذا متعلمات.. جامعيات..
أو في طريقهم للجامعة

ليه أحط صورة فاتنة لو مر عليها ولد حركت غرايزة

لا تقولين هذا سيكشن خاص بالمرأة
أتوقع كلنا سعوديين وأعرف الناس بشبابنا
قولي هنا ريحة حرمة وشوفي ردة فعلهم
وحتى؟

أغلب العضوات يكتبون في أقسام أخرى والتوقيع والصورة ثابتة
لا تقولين هو لو يبي يشوف شاف
ما عليك منه عنده رب يحاسبه..
بس لا تكونين سبب

يجي الشخص يوم القيامة تعرض عليه أعماله السيئة

أنت كذبت
أنت أظهرت مفاتنك لرجل
أنت أخرتي الصلاة في اليوم الفلاني

أنت..
أنت..
أنت زنيت
يقول يا ربي ما زنيت

يقول له لكنك ساعدت أحدهم على الزنا
وكان عليك مثل وزره

والآية صريحة
وحمدلله إننا عرب نفهمها بدون مترجم:
" ليحملوا أوزارهم كاملة يوم القيامة ومن أوزار الذين يضلونهم بغير علم ألا ساء ما يزرون"

http://www.kleej.com/vb/mwaextraedit4/extra/32.gif


هذا إهداء للبنات اللي يدخـّـلون الشباب للأسواق
في أيام العوايل لما يمنعهم السكيورتي


هو بيدخل ويرقم وتبدأ علاقة أنت السبب فيها

وهذا إهداء للي تدل على مواقع سيئة
وهذا إهداء للي ترسل رقم واحد لزميلتها

الواحد يالله يستحمل ذنوبه.. يروح يشيل ذنوب الناس

والرسول صلى الله عليه وسلم يقول
" أيما داع دعا إلى ضلالة فاتبع فإن عليه مثل أوزار من اتبعه من غير أن ينقص من أوزارهم شيء
وأيما داع دعا إلى هدى فاتبع فله مثل أجورهم من غير أن ينقص من أجورهم شيء "
أخرجه مسلم

http://www.kleej.com/vb/mwaextraedit4/extra/32.gif

يتبع

[هيفولا]

والموسيقى اللي صارت زي السلام عليكم
أصلا صارت هي التحية والافتتاحية في المواضيع


في المنتدى سيكشنات مخصصة للأغاني !!

وكأن الأغاني عادي مثلها مثل تبادل الأخبار وأسعار الأسهم
أفتح مواضيع هنا
(في منتدى غير هذا
-الحمد لله بيت عطاء الخير مافيه
-ربي يبارك في راعيه-)


إلا مقطع الصوت تلقائيا شغال أورج
يعني بالقوة؟

ما دخلت سيكشن الأغاني..بس برضو مضطرة أسمعها؟

وهذا تجاوز للحدود والحريات

والمفروض يكون أحد شروط كتابة المواضيع منع هذا الشيء

لو بأنزل طبخة في وسط موضوعي
قلتوا: خير؟ غلطانه الأخت في العنوان


http://www.kleej.com/vb/mwaextraedit4/extra/32.gif

وبالنسبة للبنات اللي ينزلون زفاتهم الموسيقية

كم وحدة مرت على الموضوع من الأعضاء وسمعتها
+
كم وحدة مرت على الموضوع من الزوار وسمعتها
+
كم وحدة بحثت في قوقل وطلع لها موضوعك

http://www.kleej.com/vb/mwaextraedit4/extra/32.gif


زميلاتي في ثانوي لما شفتهم
من كثر ذهولي
صرت أشك في نفسي
يعني لو وحده تغيرت تزعلين ويضيق صدرك عليها
لكن لما 6 كلهم تغيروا
وش ردة فعلك إلا العجب

http://www.kleej.com/vb/mwaextraedit4/extra/32.gif



لا.. وأمر الحواجب هذا أمر عجيب

ما أدري هل نزلت بعدي فتوى جديدة بجواز النتف؟

نتف وتاتوو .. والضحكة شاقة فمها.. وكأن شيئا لم يكن

لو أقولها الله يلعنك بتزعل

لكن رب العالمين يمسـّـيها ويصبـّـحها على لعنة

إتس أوكي عندها

وإلا تجيك أم 14 سنة توها داخلة عالم النتف"عالم اللعن" أسفل حاجبها كله أخضر

فعلا.. صرنا على قول المصريين
نضحك على خيبتنا

http://www.kleej.com/vb/mwaextraedit4/extra/32.gif


أما حكاية العبايات هذي يعني من جد كارثة

أقابل ربي في الصلاة محجبة
وأقابل الشباب في السوق بالعيون اللي فيها كيلو مكياج والغرة المنسدلة

أي تناقض هذا؟

أي ديانة هذي؟

أي أخلاق؟

عبايات وإلا فساتين؟

القضية اجتاحت حتى الأمهات

حريم كبار والله الشعر اللي فوق أذنها بدى يغزوه الشيب وتقول لي
تعرفين غرز الكروشيه بأحطه في عبايتي
يعني خافي الله في هالشيبات
جده والله العظيم
وش بقيتي لبناتك المراهقات
إذا أنت بتزينين عبايتك بورد كروشيه
ماألومهم لو طلعوا من غير عبايات

http://www.kleej.com/vb/mwaextraedit4/extra/32.gif


عشت في المجتمع الإماراتي حول سنة ونص
أحنا عارفين إن أهالينا محافظين أكثر منهم
وبلدنا محافظة أكثر
وموادنا الدينية في المدارس والجامعات أكثر

بس شوفوا حياتهم وتفكيرهم
كل بنت لها خطوط حمراء
هي حاطتها ومقتنعة فيها وفخورة بها

هناك المحجبة ترفع راسها بحجابها ومحد قدها

وعندنا هنا اللي عبايتها ساترة ناقص تدخل في الجدار من الحياء
تخاف يقولون عنها متخلفة
ياإنها مسوية كابوس هذي الكلمة للبنات
تذبح أمها وأبوها بس لا أحد يهمس بكلمة متخلفة

هناك تلقين البنت تقرأ كتب عليها القيمة
مثل
"ذا سيكرت - نساء من الزهرة- أسعد امرأة في العالم- سلسلة شوربة الدجاج..."

هنا تلقين في يدها رواية للهابطين اللي خسارة أكتب اسمهم هنا

http://www.kleej.com/vb/mwaextraedit4/extra/32.gif

نقطة إضافية

البلوتوثات والهوايل اللي فيها
العين تزني وزناها النظر
لو أقول لك شوفي فيلم إباحي قلتي لا حرام
طيب وهذا
ليس إلا اقتباس لأقذر ما في الفيلم !!

رسايل الجوال والنكت الجريئة
والله لو أقول لوحدة قولي الكلمة السوقية الشوارعية هذي بلسانك
قالت مستحيل بس لما تنكتب كرسالة جوال تصير كلمة عادية
لا ومضحكة بعد..تسمعين الضحكات الرنانة ..
ما أدري هل القذارة صارت تضحك؟؟
والله لو ولدك وإلا أخوك قالها
كان صرختي: عيب عليك ترى بأحرقك بالنار عشان تتأدب

قبل أي فعل تقدمين عليه
لا تحكمين إيمانك لأن يمكن إيمانك ضعيف في هذي الفترة
أو يمكن لا سمح الله أنه ما فيه إيمان في هالفترة
إحنا عارفين عقيدتنا تقول الإيمان يزيد بالطاعات وينقص بالمعاصي

ولا تحكمين قلبك لأنه ممكن قلبك يكون قاسي في هالمرحلة
حكمي عقلك لأن العقل هو نفسه ما يتغير

قولي هل لو كنت مريضة لا سمح الله بأسوي هذا الشيء
إذا الجواب إيه
أقدمي معناها إنه حلال وخير ولا تستحين منه إذا قابلتي ربك

وإذا الجواب لا
معناها تراك تجاوزتي حد مع ربك..
وبيكسر هالشيء عينك أنك تقابلينه وأنتي مسويته..

أي عمل قولي
هل لو سويته بيكسر عيني مع ربي
لو بأقول يارب اشفني وإلا يارب عطني


http://www.kleej.com/vb/mwaextraedit4/extra/08.gif

دعوة عملاقة أبعثها من هالمكان الراقي

حملة أتمنى نبدأها ونكون قدها ونوصلها ونسمعها الجميع

كفى..استهتارا
كفى ..تراجعا
كفى ..تنازلا

قومنا حملة لا للكوافيرات الغاليات ونجحت

وقومنا حملة السعودية للسعوديين فقط ولقت صداها

شدوا الهمة وساعدوني

أثروا الموضوع بردودكم الهادفة

يا صاحبة الدين..أضيفي كلمة تشهد لك يوم القيامة..
مو الدين في غرفتك تصلين وتصومين
وإذا شفت الغلط غمضت عيونك وسكت عنه.
.هذا اسمه شيطان أخرس

ياصاحبة العقل الرزين..أدلي بدلوك.. نورينا بآرائك الهدافة

ياصاحبة الثقافة..ساهمي في تثقيفنا

هذا اللي جرأ بنات الغلط على المجاهرة.
.وهو إن صوت أهل الدين والعقل والرزانة واطي

علوا أصواتكم خلونا نسمعها ونسمّـع غيرنا

نبي وحدة تكون شجاعة وسباقة للخير

أكتبي هنا أنا غيرت صورتي الشخصية أو توقيعي

يللا عشان تشجعين غيرك ويحذو حذوك
وتأخذين أجره

نبي وحدة شجاعة نبيلة تقول
أنا مسحت موسيقى كنت منزلتها في موضوعي
أو زفة نزلتها للبنات

نبي وحده شخصيتها قوية تقول
أنا مسحت صور شهيرات هوليود من موضوعي لأن ملابسهم عارية

نقدر ننزل صور بتضليل خفيف يكسر جرأة الأفخاذ والصدور اللي طالعة

خلوا شعارنا
الرجوع عن الخطأ خير من التمادي فيه

خلونا نرتقي بمجتمعنا
خلي لك بصمة في الحياة

يارب هذا أقل ما يمكن أسويه

بس أتمنى أنك تعذرني به


أنا وكل من خطت حروفها هنا إنكارا للواقع المرير

محاولة بسيطة للتصحيح.. تقبلها مننا يارب

لا تقولين المجتمع كبير ومتنوع وصعب أصلحه

المجتمع هو
أنا وأختي وأنت واختك
وهذي العضوة واختها وبنات خالاتنا وبنات عماتنا


أصـدر المولـى بــيـانه . . .أيــن أنـتِي يـافــلانـه

إفـتحـوا ديـوانـها ولـ . . . تـنـظروا في كـل خـانه

موقــف صعـب رهـيب ...أسـأل الـله الإعانــــة

حيـــن أدنو من إلهي ... دون ستـر أو بطانـــة

يحاكيني جهارا ...كيف أديـت الأمــانة

حيـنهـا تشـعر مـثلي . . .أنهـا حقـا جَبَـانـه

كم قضيت العـمر هـدراً . . . بيـن غـيٍّ ومَجَانـه

يا لقـلب الـسوء أرخى . . . لـلهوى الـعَاتِـي عَـنَانَه

فـي متـاهـات المعاصي . . . يـخـسر الـقلبُ رهــانَه

من يـجيب الله عنـي؟! . . .مـن سيـعـطيـني لـسـانـه

لحـظة مـن هولها لا . . .يـملـك الـعـقل اتـزانـه

ضاع مفتاح النـهى . . .واخـتَّل مـيزان الــرزانه


http://www.kleej.com/vb/mwaextraedit4/extra/56.gif

ما رايكم
نبداأ؟؟

http://www.kleej.com/vb/mwaextraedit4/extra/89.gif

خلوا شعارنا

الرجوع عن الخطأ خير من التمادي فيه

http://www.kleej.com/vb/mwaextraedit4/extra/56.gif


خلونا نرتقي بمجتمعنا
خلي لك بصمة في الحياة

http://www.kleej.com/vb/mwaextraedit4/extra/47.gif