|
بابا فى رمضان
بابا فى رمضان قضيت فترة طفولتى و شبابى و أنا بشوف بابا فى رمضان بيعمل أيه .. يرجع من الشغل يغير هدومه و يصلى و يدخل على المطبخ على طول .. يحط الفرخة تتسلق و يعمل السلطة و الرز و يقطع البلح و يبله فى اللبن و يعمل الزبادى للسحور .. يسيب لماما بس الطبخ .. و تخيلوا بيغسل المواعين اللى استعملها .. و يقعد يهزر و يضحك مع انه كان بيدخن وقتها لا عمره قال إبعدوا عن وشى و لا أنا خلقى ضيق و لا طلع ظرابينه عليها و علينا .. يطلع من المطبخ يلمنا و يحكيلنا قصص دينيه و بعدين يمسك المصحف يقرا شوية بصوت جميل وواضح بحيث حتى لو بنلعب نسمعة ، يشغل الشيخ الشعراوى و دى حاجة مقدسة لبابا محدش يبنفع يقاطعة فيها و لا يطلب تغيير القناه .. اول ما يخلص جررررررررى على المطبخ تانى يحضر الفطار مع ماما و يشيل الاطباق يطلعها او يعملنا الرز بولات و السلاطة اشكال و نقعد نقول وراه دعاء الافطار و ناكل . .الكلام ده حتى و احنا كبار . مرحلة السحور بقى كانت أجمل حاجة فيه لان ماما من الفصيله اللى بتنام بدرى جداااااا بعد العشا على طول و هو بيسهر دايما .. كان يحضر السحور بالكامل و يصحيها و يصحيهم ما عدا أنا لانى ضد الصحيان . .يجى يقعد على الارض جنب سريرى و معاه ساندويتش جبنه و كوبايه لبن و يبتدى يقطع الساندويتش لقم صغيرة يحطها فى بقى و انا بين النوم و الصحيان و وراها بق لبن و هو بيقول علشان خاطرى دى بس، اخر حته ، كلى دى و مش هديكى تانى ... و يفضل كده لحد ما اخلص عمره ما هان عليه انى اصوم من غير سحور . كان عندى قناعة إن كل الرجالة كده و كل الابهات كده لحد ما عرفت أن بابا كان وحيد فى اللى بيعمله و أن رقة القلب و الحنيه دى مش حاجة عند كل الناس .. بابا مات من ١٥ سنة .. بس لحد النهاردة عمرى ما نسيته فى أى يوم و خصوصا فى رمضان ، كل يوم أمى بتعيط و تدعى له و أنا بعيط و ادعى له . .بدعى له بالرحمة على قد الرحمة اللى شفتها منه بدعى له بحب و أنا واثقة إن ربنا بأذن الله هيغفر له و يسامحة .. هل جزاء الاحسان الا الاحسان . متكونوش فى حياه ولادكم مؤدين هو مش تسديد خانة خليكم قدوة و مثل ، خليكم ذكرى جميلة علشان يفتكروكم بالرحمة من قلبهم زى ما انا بدعى لبابا و علمت ولادى يدعوا له ووصيتهم يدعوا له بعد انا ما اموت علشان عمله ما ينقطعش .. اللى بابا بيعمله مكانش صعب و لا كان مجهود عليه كان حب لبيته و أولاده .. و ده اللى خلاه مش بيتنسى .. اعملوا الحاجات الصغيرة و صدقونى دى اللى باقيه لكم . الله يرحمك يا بابا و يحسن اليك و يجمعنى بيك فى الجنة ..وحشتنى اوى رحاب_الجندى رائع هيفولا:) |
| All times are GMT +3. The time now is 07:12 AM. |
Powered by vBulletin® Version 3.8.5
Copyright ©2000 - 2025, Jelsoft Enterprises Ltd.