لك يوم يا ظالم
بقلم / أماني صلاح الدين
لك يوم يا ظالم
حتلقي فيه ربك
وكفايه إنه العادل
اللي حيحاسبك
لك يوم يا ظالم
ومهما طال الزمن
حتسدد اللي عليك
وتدفع فيه الثمن
لك يوم يا ظالم
ويا ويلك من دا اليوم
لاحينفع فيه بكا
ولا عتاب ولا لوم
لك يوم يا ظالم
يا قاسى يا مفتري
اعمل اللي إنت عايزه
اظلم كمان وافتري
لك يوم يا ظالم
حتشوف فيه عملك
وتشهد عليك
إيديك ولسانك وجلدك
لك يوم يا ظالم
واحنا عليك شهود
والله ما حيضيعنا
ربنا المعبود
لك يوم يا ظالم
عملك اكيد هيطولك
لا حينفع ساعتها
عرضك ولا طولك
لك يوم يا ظالم
يوم ما تقوم قيامتك
والحق منك ينتقم
إنت وعصابتك
يا للى اتظلمت اصبر
الظلم عمره ثانيه
والعدل مهما غاب
حيملا أكيد الدنيا
يا للى اتظلمت افرح
دعوتك للسما طايرة
لا حتمنعها سجون
ولا عباد جايرة
يا للى اتظلمت قول
يارب يارحمن
حسبى وأنت وكفاية
أنت الحما والأمان
يا للى اتظلمت ابشر
حتقابل الرسول ( صلى الله عليه وسلم )
وحتشرب من إيده
وحتشبع علاطول
يا للى اتظلمت افتكر
لو مت تبقى شهيد
والجنه لك سكن
وهما عنها بعيد
يا للى اتظلمت اعرف
دعوتك سهم صايب
والظلم ده والله
ظلمات على كل غاصب
الحق راجع راجع
والعدل راجع راجع
والخير فى الأمة وفينا
مهما كانت المواجع .
ودمتم بخير
بقلم الفقيرة إلى رب العزة
أمانى صلاح الدين