[هيفولا]

طريقة عمل رولات التوست اللذيذه الشهيه والسهله بالصور





جايبة لكم طريقة حلوة تصلح للفطور أو عشا خفيف...

نبدأ بسم الله...

مقادير عمل رولات التوست :

8 قطع توست منزوع الأطراف
قرص بيض مقلي
شرايح مرتديلا
جبن سلايس
قطعة هوت دوغ
مايونيز - خردل - جبن كاسات
بيض و بقسماط للتغميس


طريقة عمل رولات التوست :

أول شي، أنا فرشت ورق نايلون على الكاونتر عشان أبدأ الشغل!
و جبت قطع التوست، و رقيت كل ثنتين مع بعض...



ثبتوا الأطراف على بعض و رقوهم زين..
اللي عاليمين رقيتها، و اللي على اليسار قبل الرق!
و بكذا بيصير عندكم 4 شرايح توست مستطيلة الشكل!


الحين نجي للتطبيق!

هذي مقاديرنا اللي بنستخدمها للحشوة...


البيض أنا بهرته بملح و فلفل بعدين قليته قرص دائري كبير و قسمته بالنص... و الهوت دوغ شويته قبل ما استخدمه بالطريقة، و ممكن تقلونه!

أول شي نجيب شريحة توست (هذي الطبقة الأولى) و ندهنها إما بالمايونيز أو الخردل أو جبن الكاسات حسب الرغبة (أنا نسيت أدهن التوست)، بعدين نحط نصف قرص البيض...


فوقه نحط شريحة توست (هذي الطبقة الثانية) و ندهنها نفس الشي، و بعدين نصف فوقها المرتديلا...


وفوق المرتديلا نحط شريحة توست (الطبقة الثالثة)، و ندهنها، و نحط النص الثاني من قرص البيض و فوقه شرايح الجبن السلايس!


الحين نجي لآخر خطوة!
نحط آخر شريحة توست (الطبقة الرابعة)، و ندهنها و فوقها قطعة الهوت دوغ...


الحين بمساعدة ورق النايلون، نلف شرايح التوست المحشية بالطول، و نشد ورق النايلون عليها عشان ما تنفنح أو تتشقق!
و هذا شكلها بعد ما لفيتها...


خلوها على جنب، و جهزوا صحنين، و احد نخلط فيه بيضة، و الثاني نحط فيه بقسماط، و نجهز مقلى كبير و نذوب فيه قطعة زبدة صغيرة و شوي زيت...

بعدين نفك ورق النايلون و نغمس الرول بالبيض بعدين بالقسماط...

و نحمرها في المقلى اللي جهزناه، قلبوها عشان تتحمر من كل الجهات... و ننتبه ما تكون النار حامية كثير، خلوها أقل من الوسط عشان نتأكد إن الرول يسخن زين و إن الجبن يذوب!



و هنا رولات التوست بعد ما قليتها...



الحين قطعوها بسكين حادة، أنا طلع معاي 6 شرايح!

و هذا شكل رولات التوست بعد التقطيع ، و قدمتها مع الهاش براون







طبعاً ما يحتاج أتكلم على الطعم... انتوا جربوها و احكموا

إن شاء الله عجبتكم رولات التوست بطريقتي، و بالعافية مقدماً