[هيفولا]

الكرواسون والباتيه على أصولهم بالصور





الكرواسون ده مقاديره مظبوطة خالص
والمهم النتيجة النهائية
انا مصورتش خطواته لأني ماكنتش عارفة انه هيطلع ناجح كده


ده الكرواسون بالجبنة والزيتون







شوفوا واضح فيه التوريق من بره ازاي

وده الباتيه بالشيكولاتة نفس عجينة الكرواسون
الجاية دلوقتي






المقادير
قبل المقادير ايزة اقولكم احترموا الكرواسون
والباتيه يحترمكم ومايكسفكمش
المقادير :
نص كيلو دقيق
معلقة كبيرة ممسوحة ملح
1/3 كوباية سكر
بيضة
ربع كيلو زبدة صفرا مش فلاحي ومش زبدة نباتي اخدت منها معلقة حطيتها جوه العجينة
2معلقة كبيرة لبن بودرة
تقريبا 225 مل ميه منهم ال هتدوبي فيهم الخميرة وممكن تستبدلي الميه باللبن
معلقة خميرة جافة كبيرة ومليانة كده ولو خميرة بيرة تبأى حوالي معلقتين
2.5 جرام محسن خبز ولو مافيش يبأى 1/4 باكو بودر
الطريقة:
اعجني كل المقادير ما عدا الزبدة وخلي بالك من المية حطيها شوية شوية
واعجني العجينة كويس أوي
سيبها ساعة أو ساعتين في الثلاجة في الثلاجة تستريح
تكوني في الوقت ده بتفردي الزبدة على ورقة زبدة أو كيس نايلون تفرديها راقة واحدة
يعني تحطيها بين وقتين زبدة أو بين ضرفتين كيس نايلون
وتفرديها بالنشابة مربع بحوالي سمك نص سم
تطلعي العجينة من الثلاجة بعد ساعتين وتفرديها
استعملي في عملية الفرد دقيق زي ما انتي عايزة
بس لازم قبل ما تطبقيها تشيلي أي دقيق من عليها
الخطوة دي مهمة جدا جدا
بعد ما فردتي العجينة بالدقيق هتحطي الزبدة في النص
وتقفلي العجينة عليها زي الظرف وتفردي براااحة خالص
أهم حاجة الزبدة ما تخرجش بره خليكي رقيقة مع العجينة
اتعاملي معاها كأنك بتتعاملي مع حاجة حيه
بعد ما فرتيها اطويها اربعة
استني
اوعي تنسي تشيلي أى دقيق من عليها قبل ما تطويها
خلاص طويناها نحطها في صنية ونغطيها بكيس نايلون أو ورق فويل
و نحطها في الثلاجة ساعة ساعة ونص ساعتين
هتحطيها في الفريزر علشان تسرعي الحكاية
احترمي العجينة تحترمك على الثلاجة
بعد الساعة ونص تكون الزبدة جوه العجينة جمدت تاني
نطلع العجينة ونفردها تاني بالدقيق ونطبقها اربعة برده
وأوعوا تنسوا تشيلوا الدقيق خالص قبل ما تتطوها
خلاص طويناها ندخلها الثلاجة تاني
ونكرر الحكاية دي 4 أو 5 مرات
بعدها نطلعها من الثلاجة ونفردها
ونقطعها مثلثات للكرواسون ومستطيلات للباتيه
ونحشيها ونلفها واعتقد كلكم تعرفوا تلفوا الكرواسون
وعلى الصنية نسيبها تتخمر براحتها بره المطبخ
وأوعي تروحي ناحية فرن البوتجاز

خمروها في مكان عادي براحتها سبيها ساعتين
هي دي صورته وهو بيخمر لسه حطاه بره المطبخ



بعدها تسخني الفرن على 200
على ما يسخن تكوني دهنتيها
ب( بيض ولبن وفانليا وعصرة ليمون علشان ظفارة البيض)
وتحطيها في الفرن السخن مش هتخد وقت في الفرن خالص
وبالهنا هتتباهي بيها في وسط أهلك
ومش هيصدقوا ان انتي أل عملاها



الف هنا وعافية

المعمول
وده مقاديره مضمونة 100 في 100 وسهلة قوي
هنستعمل في المقادير أي معيار عندك كوباية سلطانية
علبة ثلاجة زي ما انتي عايزة بس تعايري بيه باقي المقادير
مقادير المعمول
2 كوب سميد
1 كوب دقيق
1 كوب سمنة أو زبدة
معلقة محلب مطحون
عجوة معجونة مع معلقة سمنة للحشوة
ماء ورد وفانليا للطعم
ولبن للعجن على قد ما تعوز معاكي العجينة وتلم
ما تحطيش لبن كتير علشان المعمول ما ينشفش
ذرة ملح
الطريقة
هتحطي السميط مع الدقيق والمحلب والفانليا والملح وتقلبي
تضيفي السمنة السايحة مش المقدوحة يادوب سايحة وتبسسيها معاهم كويس
بعدها تضيفي اللبن وماء الورد وتعجني لحد العجينة ما تلم
تسيبيها تستريح طول الليل
يعني تعجنيها باليل وتشكليها الصبح
أو تعجنيها الصبح وتشكليها بالليل
انا استعملت في التشكيل قالب القرص
وبعفره بالدقيق وانا بشتغل
و الفرن 180
لو فرنك صغير مش هتحتاجي تولعي الشواية
ولو كبير تسيبيها لحد ما تستوي من تحت
وتولعيلها الشواية تاخد لون من فوق
ما تسيبيهاش تاخد لون لوحدها من غير شواية
للي فرنها كبير علشان ما تتحرقش من تحت وتنشف منك
وطبعا الحاجات دي بتدخل الفرن من النص
وده شكلها بعد ما خرجت






هيفولا