[هيفولا]

كيكة سهلة جدا

ده الكيكه المعتمده اللى باعملها دايما كل ما اكون صاحيه
وما عنديش نفس لاى فطار يبقى الكيكه دى و فنجان النسكافيه وشكرا

كوبين دقيق منخولين مضاف لهم ذره ملح
3 بيضات حجم متوسط او 2 كبار
كيس فانيليا بس المره ده كانت خلصت
فاتصرفت وضفت بداله معلقه كبيره مسحوق ايس كريم فانيليا ونفس التاثير واحلى بجد
كوب سكر او كوب الاربع لانى مش عايزاها مسكره قوى
نص كوب زيت نباتى(عايزه بالزبده او السمنه يمشى الحال)زيت ذره او دوار شمس
كوب لبن دافىء زى دمعه العين كده
معلقه كبيره مسحوق بيكنج باودر
ملحوظه
لو عايزاها شيكولاته نقصى ربع كوب دقيق وحطى مكانه كاكاو
وساعات بالنسكويك بيمشى الحال برضه


بانخل الدقيق واضيف له البيكنج وطبعا الملح ولو الكاكاو فى حاله لو عملتها غامقه
وفى دورق الخلاط اضيف كل المكونات السائله مع بعض واضيف السكر
بيض+ لبن+زيت+سكر+ فانيليا
وبعدين لو عندى محسن كيك اضيف معلقه ما عنديش مش مشكله
واضيف بقى المكونات السائله للجافه زى طريقه المافن كده
واصبها فى قالب او صينيه اواى فورمه عندك
تكونى دهناه زبده ورشاه دقيق

تماااااااام
وطبعا الفرن بتكونى شغلتيه مع بدايه الشغل
والتحضير على درجه 180 درجه (متوسط)
وتدخلى الكيكه وبتاخد من ساعه الا تلت الى ساعه الا ربع
ممنوع تفتحى عليها قبل مرور نص ساعه على دخولها الفرن

ودى صورها لما خرجت
واتقطعت بالسلامه بس انا قطعتها على السريع
عشان كان الولاد عايزين يفطرو وصورتها برضه على السريع



بصو اد ايه هشه وعاليه يا بنات


صوره كمان للحبايب




جربوها وان شاء الله تعجبكم

اتفضلو معانا الفطار



الف هنا وعافية

هيفولا