[هيفولا]

رقاق طرى وفطير وبالصور






بصو بقى انا دايما
بتهف عليا حاجات كانت ماما بتعملهالنا وكانت بتبقى رووووووعه
واهمها الفطير والرقاق او البتاوى

وقد كان وتم بحمد الله
يلا بينا نشوف ازاى::

اولا الرقاق الطرى :::
عجينته سهلة جدا
دقيق عليه رشة ملح ورشة سكر
وبعدين ضيفت عليهم زبادى وزيت
وقلبتهم مع بعض
وكانت العجينة مفرولة شوية بالشكل ده


وبعدين كملت العجن باضافة مياه قليلة
بضيفها شوية بشوية لحد ماتلم العجينة معانا
ونعجنها كويس اوى وهتبقى بالشكل ده
وتفتح وتبقى ناعمة


نغطيها ونسيبها ترتاح شوية وتبقى كده


وبعدين نقطعها كور صغيرة
او على حسب الحجم اللى انتى عايزاه
انا عملتها صغيرة على حسب حجم
الطاسة التيفال
اللى سويتها فيها



بعد ماقطعتها سيبتها شوية ترتاح بردو
علشان نعرف نفردها كويس
وتبقى طرية وجميلة كده

واجهز عدتى بقى ههههههه
طبق كبير وفيه فوطة نضيفة
وطبعا بطل القصة
الطاسة الجميلة بتاعتنا
بنسخنها كويس اوى


وعلى بال ماتسخن
نفرد الرقاق واحده واحده بالشكل ده

وانا براحه على ايدى علشان يبقى رقيق وخفيف

ونفردها فالطاسة ونهدى النار عليها بحيث مش تتحرق منك
ولا تتلسع وتبقى مستوية كويس



شايفين بعد مابدأت تستوى
بقت عاملة ازاى وازاى اتنفخت وقبت
اقوم قالباها على طول بقى عالوش التانى




واكون مجهزة التانية وهكذا
وعلشان الوقت بقيت افرد اكتر من واحده بالشكل ده



بحيث مضيعش وقت لانها مش بتاخد وقت
مجرد ثوانى لكل وجه

وكل واحده تخرج احطها على طول فالطبق والفها بالفوطة
علشان يفضل طرى وسخن كمان
ومش ينشف منك



وهكذا



شوفو شكله عامل ازاى
ودى كمان



ماشاء الله كان حلو بشكل بجد ريحة وطعم واااااااااااااااو
بصراحة مقدرتش اقاوم الريحة وقلت ادوق بس ههههه



وبالف هنا على قلوبنا بقى هههههههههه


يارب يكون عجبكو وتكون طريقتى سهلة وواضحه
وبجد يابنات لو جربتووه مش هتبطلوه لالالالالا

بالشكل ده

ثانيا الفطير

عجينته سهله جدا
يدوب دقيق عليه رشة ملح وسكر
ونعجنه كويس اوى اوى بالمياه
وبتبقى العجينة بالشكل ده بعد ما لمت


واسيبها ترتاح شوية
على بال مانجهز عدتنا بردو الصوانى والزيت
والقشطة والحشو لو حابين
بعد مايرتاح نقطعه على عدد الفطاير اللى هنعملها
انا بحبه يكون خفيف وصغير بردو
بعملته بالحجم ده



وبردو نريحها شوية لسهولة الفرد
وندهن الرخامة زيت وندهن ايدينا كمان
ونبدأ نفردها بالراحة كويس اوى اوى اوى
بحيث تبقى رقيقة اوى اوى
زى ماشايفين كده فالصورة شايفين ولو عرفتى ترقى اكتر من كده
يبقى ميت فل وعشرة ههههههههههه


وطبعا ادهنها زيت تانى او مكس زيت وسمن زى ماتحبى



واطبقها كل طرفين على بعض اليمين عالشمال
والعكس والطرف اللى فوق عاللى تحت والعكس
واسفة مش عرفت اصور الخطوات دى لان ايدى كانت كلها زيت
فمعرفتش امسك الموبايل

وهتبقى مربعة بالشكل ده


وطيعا ادهن زيت بين كل طبقة والتانية واحاول ادخل هوا
بين كل طبقة بردو على اد مااقدر
علشان يبقى مورق وجميل


وانقلها بعد ماطبقتها فصينية مدهونة زيت
وافردها بالراحة فالصينية وادهن وشها قشطة



وادخلها الفرن الساخن من قبلها

وده شكلها فالفرن شايفين قبت وعلت ازاى
وطبقاتها هشة جدا
والقشطة سايحة عليها واااااااااو



وفيه فطيرة انا زودتلها رشة جبنة عالوش كمان

ولو هتعمليها محشية يبقى بنحط الحشو فالنص بعد مااتفردت فالاول خالص
وبعدين اطبقها عالحشو انا كنت حاشية واحده بالجبنة الرومى
ودى كان شكلها فالفرن والجبنة سايحة ونايحة فوقيها

ودى شكلها بعد ماخرجت شايفين اللون والشكل عامل ازاى
طبعا مالحقتش اصورها سليمة هههههههه
على طول اتخطفت فلحقتها بالعافية



ودى الصورة جماعية للرقاق والفطير

الف هنا وعافية

هيفولا