[هيفولا]

كيكة الشطرنج بفكرة مختلفة وبسيطة

اللهم صل على سيدنا محمد وعلى اله وصحبه وسلم

** اخواتى الحبيبات لعلكم بخير جميعا وبافضل حال **
:::::::::::::

كلنا عارفين كيك الشطرنج وشكله الجميل وبما ان له اكتر من طريقه
اخترت اسهلها ونفذتها
والفكرة للشيف اسامه السيد بارك الله فيه

وكمان الشيف منال العالم بتعملها بصوانى مخصصه
وبتكون متقسمه من الوسط 3احجام

عشان كده بحثت على اليوتيوب ولقيت اسهل الطرق وغيرت فيها كتير

انا اخدت الفكرة فقط من الشيف اسامه وعملت كيك اسفنجى
لانه كان عامل مقدار كيك دسم

وكمان الكريمه مختلفه انا اقتبستها من التيراميسو وحلى الطبقات

اما الشوكولاته فهى من حلى البسكويت من النت

يعنى اخدت من كل وصفه فكرة وجمعتهم هنا بالشكل ده
ان شاء الله تعجبكم و تنفذوها لانها فعلا رائعه
الخطوات بسيطه
بس الصور كتير عشان تكون واضحه للجميع

نبدأ بسم الله

المكونات

كيك اسفنجى ابيض ساده
كيك اسفنجى شوكولاته

فى نفس الصينيه نكرر المقدار ولازم الصينيه مستطيله كبيرة

الكيك الواحد ب 4بيضات كبيرة ونص كوب سكر او اكتر معلقه
و3/4 كوب دقيق فاخر واقل من ربع كوب ماء دافى
وم ص بيكنج بودر وفانليا و م ص خل ابيض

ومكانش عندى نشا وافتكرت ان مامتى ربنا يخليهالى دايما
بتعملنا الكيك الاسفنجى واحنا اطفال بدون نشا وبيكون تحفه

1كوب شربات خفيف
2 باكيت كريم شانتيه
علبة قشطه 170جم
نصف كوب حليب بارد
1باكيت كريم كراميل البودرة فقط

نخفق الكريمه مع الحليب المبرد او المثلج حتى تتضاعف
ثم تضاف القشطه والكريم كراميل البودر والفانيلا
ونستمر بالخفق حتى نحصل على خليط كريمى متماسك

الكريم كراميل بيخلى الكريمة متماسكه جدا ومائله للون الاصفر
وبيساعد على تماسك طبقات الكيك فيما بعد

لكن بامكانك وضع كريم شانتيه فقط مع الزياده ل 3 مغلفات
او كريمة الزبده زى تورتتى السابقه

هنقسم الكيك المستطيل بالنصف بالطول
يبقى 2شريحة كيك ابيض
و2 شريحة كيك بنى

بالفرشاه نسقى الشريحة الاولى بالسيرب

مش لازم تخلصى كوب الشربات كله يعنى على حسب ما تاخد الكيك
المهم توزعيه كويس
من البدايه للنهايه على كل طبقه وبعده كريمة

وبعدين نفرد الكريمة
وزى ما حضراتكم شايفين الكريمة متماسكه جدا
وممكن تستعمليها فى اى كيك او
تزيين نهائى وكمان طعمها رائع واخف من كريمة الزبده

هنا هنبدل الطبقات
يعنى الاول كيك ساده وبعدين كيك شوكولاته
ونسقيه بالسيرب ايضا ثم كريمه
ونكرر ابيض وننتهى باخر واحده رقم 4 شوكولاته
او العكس زى ما تحبى

كده اربع طبقات بالتبادل
تمااااااام

بالسكينه المشرشرة هنساوى الاطراف خفيف جدا
وندخلها التلاجه ساعتين او الفريزر لو مستعجله لمده ساعه
عشان الكريمه تتماسك مع الكيك
ونعرف نقطعها فيما بعد

بعد ما الكيك تماسكت مع بعضها هنقطعها تانى
استنى طولى بالك
هى دى اهم خطوة ...

هنقطع الكيك على 4 بالطول
وحاولى تحددى المسافه بالسكينه الصغيرة
ولو عندك مسطرة يكون افضل
انا مش عندى لان ابنى فى حضانه وعملتها عشوائى وكانت مايله شويه
بس مش مشكله كله هيتاااااااااااااكل

نكرر طبقات الكريمه تانى بين كل راق
وكتريها عشان تمسك المربعات سوا

.... ركــــــــــــزززززززززززى .....

هنحط الكيك بالعكس
اللى اخرها ابيض يبقى عليها كيك اخرها بنى
هتقلبيها بس سهله جدا

كده خلصنا
وغطيتها من فوق بلمسه خفيفه من الكريمه الباقيه
وقطعت الاطراف تانى
ودخلتها التلاجه عشان احضر الصوص

وممكن تعملى كريمه ساده او اى صوص شوكولاته بتحبيه
وتزيينيها براحتك حسب افكارك

نكمل بسم الله

اسهل واجمل صوص شوكولاته

تقدرى تستعمليه فى وصفات كتير
وطريقته على نفس مبدأ البشاميل

المكونات

2م ك زبده او سمنه مع معلقه زيت
3م ك مليانه دقيق
نحركهم على نار هاديه لغايه ما يبقى دهبى فاتح3 دقايق بس

وبعدين نبعده عن النار ونضيف
1و1/2 كوب حليب
(انا استعملت كوب حليب الشوكولاته الجاهز بالشاليمو
ونص كوب حليب ساده فيما بعد )
4م ك سكر +4 م ك كاكاو

نخلط المكونات ونرجعهم تانى للنار
ونستمر فى التقليب بالمضرب السلك

لغاية ما يبقى الخليط ناعم ومتجانس
ولو تقيل خففيه بالحليب بالتدريج
ويكون بالشكل ده

الصوص مغطى الاسباتولا وفى نفس الوقت بينزل منها بشكل منقار
وهو ده القوام المطلوب
لاهو تقيل اوى ولا خفيف اوى وكل ما يبرد يجمد اكتر

نصبه على الكيك مباشرة وهو سخن عشا يتجمد عليها ويتماسك
ونوزعهباسباتولا على السطح والجوانب
ونشيل الزياده وندخلها التلاجه

بسكوتة تصبيرة بحشوة الشوكولاته اللذيذه لانى مش باقدر اقاومها
تقدرى تعمليها لولادك حلو سريع وتغطيها بالمكسرات او الفارماسيلا الملونه
او جوز الهند او ساده زى كده

عملت مغلف كريمه بس كمية الحليب اقل من المكتوب على العبوة
وزينت الاطراف

انا زينتها وكتبت عليها وباقى نص كمية الكريمه
احتفظت بيها فى الفريزر بكيس الحلوانى النايلون
لوقت اخر بمشيئة الله

نكمل بمشيئة الله

الكيك بعد ما نغطيه بالشوكولاته ونزينه بالكريمه
لازم يسقع فى التلاجه قبل التقطيع
عشان الطبقات تتماسك مع بعضها وما تتفكش اثناء التقطيع

انا عملتها قبلها بيوم
نقلتها بالراحه من الطبق الاول
وحطيتها على كرتون مستطيل مغلف بالفويل

وهنا لما اتقطعت

طبعا هى مش مظبوطه لانى عملتها بدون مسطرة
وايدى مالت اثناء التقطيع

الحمد لله من جوا مظبوطه شوية الى حد ما

الف هنا وعافية

هيفولا