[هيفولا]

السمبوسة




(السمبوسة) وهي في الاساس وصفة هندية
لكن منتشرة جدا جدا في دول الخليج
بالذات في السعودية وهي من المقبلات الضرورية جدا جدا
والي لازم تكون موجودة على سفرة الفطار في رمضان
هي وتؤم روحها (البكورة)
ما تخافيش من الاسم هي وصفة هندية برضو وطعمه ولذيذة
بشكل أكيد حنزلها قريب هي وعيش الجباتي والبراتي الهندي.

السمبوسة يا جماعة بتتعمل من العجين
وفيه نوعين نوع رقائق عجين السمبوسة بيتجاب جاهز من السوبرماكت
وبيبقى متلج وممكن يتعمل برضو في البيت .

والنوع التاني والي حيكون موضوع حلقتنا
وهو الي بيتعمل من عجينة فرش محضرة في البيت .
وبصراحة عن نفسي بفضل النوع التاني لانو لذيذ بطريقة رهيبة جدا جدا
وما يتشبعش منو بجد بالذات لو عملتيه بحيث تبقى العجينة وسط مش رقيقة ولا تخينة
ولما تتقلي تبقى طرية من جوة ومقرمشة قرمشة جميلة
كدة زي الشيبس من برى بس ما تبقاش شاربة زيت

مقادير عجينة السمبوسة :
لكل 2 كوباية دقيقة مخبوزات
1معلقة طعام نشا ذرة
ربع معلقة صغيرة ملح
ربع كوباية زيت نباتي



في الفود بروسيسر او اعجنيها بايديك بنفس التكنيك
حنضيف الدقيق والنشا والملح والزيت النباتي
ونشغل المكنة عليهم
ولو حتعمليهم بايديك يبقى حتبسيهم
زي ما بنبس عجينة الكحك.


حيبقى ده شكلهم زي الرمل المبلول شوية



هنا صورة أقرب



حبدأ نضيف شوية ماية مع العجن المستمر لحد ما العجينة تلم .
طبعاً مقدار المية راجع لنوع الدقيق بس لو حتستخدمي دقيق فاخر
الكوبايتين دقيق مش حياخدو أكتر من 3/4 كوباية ماية أو أقل شوية .



وده شكلهم بعد العجين بتبقى عندنا عجينة ملساء وناعمة وطرية
بس متماسكة زي كده



ولازم نستمر في العجن لحد ما تبقى عندنا
بتشد كدة من غير ما تتقطع



حنلم العجينة على شكل كورة ونرش الدقيق عليها
ونحطها في وعاء ونغطيها بالنايلون بشكل كويس علشان ما تنشفش.



نسيب عجينة السمبوسة ترتاح على الاقل ساعتين
لو مستعجلة عليها وممكن ليوم كامل .
وممكن تعمليها وتسيبها في الثلاجة لتاني يوم مافيش مشاكل .
لكن ما تزدش مدة احتفاظها في الثلاجة عن 4أيام .



نرجع للسمبوسة يا جماعة
طبعاً أهم حاجة بعد العجين هو الحشو .
ودي حرية شخصية راجعة ليكي احشيها بالي تحبيه انتي وأسرتك
بس بالنسبة ليا أروع حشوتين للسمبوسة في الوجود هما
(اللحمة المفرومة المعصجة والجبنة البيضا المخلوطة مع بقدونس ونعناع
مهما أوصف مش حلاقي حاجة توفيهم حقهم .



وفيه حشوه كمان جربتها بس طلعت رائعة واعتمدها عندي
وهي جبنة مزاريلا وجزر مبشور وفلفل بارد متقطع شرائح رفيعة جداً
واتأكدي من الملح علشان المزاريلا بيبقى ملحها خفيف .
وعلى فكرة أساس السمبوسة هي حشوة البصل
وهي حشوة هندية ما أقدرش أوصف لكم جمالها
.


ودي حشوة الجبنة المزاريلا والجزر والفلفل لما بقت جاهزة .

كدة عجينة السمبوسة بقت جاهزة بعد ما ارتاحت بشكل كويس
مدة ساعتين وممكن أكتر كمان

حنحتاج بالأضافة للحشوات الي عندنا شوية دقيق لرش العجينة ونشابة .

وحنحتاج كمان لقطاعات السمبوسة
وممكن ببساطة تعمليها بقطاعت البيتزا
على شكل مربعات مافيش مشاكل حسب المتوفر عندك او حتى بالكوباية .

وحنحتاج لصواني مرشوشة بالدقيق

بإسم الله نبدأ :
نفرد العجينة بسمك لا تخين ولا رفيع يبقى كويس
علشان ما تنسيش حتبقى طبقتين وبينهم حشوة
علشان ماتبقاش كلها من جوة عجين.

الفتوكات الي في الخليج حتلاقو القطاعات دول في محلات المواعين العادية
او المولات متوفرة في كل مكان تقريباً .
وفكرتها انك تاخدي حتة عجينة بنفس مقاسها

وحتحطيها بالصورة دي على قطاعة السمبوسة

وترصي الحشوات بتاعتك
وتغطيها بحتة عجينة تانية بالشكل ده

وتدوسي علشها بالنشابة علشان تقفل الحواف كويس
وتدينا شكل المثلثات دي

ودي صورة أقرب ليها
واتأدي من انها مقفولة كويس



وده شكلها الجميل جدا بعد ما نزلت من الناحية التانية
مقصوصة وجميلة والحواف مقفولة .

وبرصهم في الصواني المرشوشة بالدقيق بالصورة دي

وده الموديل التاني متوفر بشكل كبير وكل الستات تقريبا
عندهم زيه مع اختلاف الموديل .
حنقطع بقعر القطاعة الدائرة بالصورة دي



دي صورة أوضح ليهم



هنا بقا يا فتوكات حنحتاج اننا نده الحواف بالماية
علشان تلزق كويس وما تفكش مننا أثناء القلي .



وحنحط الحشوات بتاعتنا الي احنا عايزينها
بس نراعي ما تزدش عن معلقة طعام ممسوحة بالنسبة للمقاس الكبير .
كمان تكون الحشوة في النص مش على الاطراف





ونقفلهم على بعض بالصورة دي علشان الدائرة تقفل وتبقى نص دايرة
وتاخذ شكل الفرمة والناحيتين يلزقو مع بعض



ودي صورة أقرب



اية رأيكم في الجمال ده



وحيبقى عندك أحلى سمبوسة في الوجود



وكالعادة بواقي العجينة تلميهم على بعض
وترجعي تفرديهم وتكرري العملية الجراحية



وبرضو رصيت الموديل ده في الصواني المرشوشة بالدقيق






وممكن تعلمي الموديل الصغنن أوي ده كنوع من أنواع الحلويات
بحيث انك تحشية مكسرات أو زبيب
وبعد القلي تحطيه في الشربات حيبقى جميل جدا عن تجربة.




المقدار ده يعملك بين 22-25 وحدة سمبوسة حجم وسط وده شكل الكمية كلها .

لو مش عايزين نستخدمها دلوقتي

ممكن نفرزها بالطريقة التالية:-
1-ندخل الصواني كدة الفريزر لمدة ساعة



2-ده حيبقى شكلهم حيبقى مجمدين
ومحتفظين بشكلهم بطريقة ممتزة جدا





3-حنحطهم في أطباق بلاستك او فوم ونحفظهم في الفريزر



بصو شكلهم مترتب وجميل عشان جمدناهم قبل ما نرصهم فوق بعض
فاحتفظنا بالشكل الجميل ونفس الفكرة ممكن تستخدميها
مع الكوبيبة الشامي والكوفتة علشان نحافظ على الشكل
ودي حاجة مهم جدا جدا بالذات للحاجات الي محشية .



طريقة القلي:-
نقلي السمبوسة في زيت متوسط الحرارة ونحاول ما نقلبهاش خالص
غير ما الوش الي تحت يحمر ويبقى ذهبي .
ولو طازجة حتاخذ حوالي 4دقايق غلى 5 دقايق في الزيت
ولو مجمدة بتاخذ وقت أقل من كدة .
ونطلعهم على ورق نشاف علشان باقي الزيت ينزل.

بصو شكلهم من قريب مقرمشين والشكل تمام 100%
علشان اتبعنا خطوات مدروسة وناجحة


الي بيميز السمبوسة بتاعتي انها بعد القلي بتقى منفوخة كدة
ومقرمشة من برى قرمشة جميلة جدا زي البسكويت الناعم اوي
ومن جوة طرية ومش معجنة .
بصي لما ضغط عليها اية الي حصل



وهنا صورة أقرب كمان



رصيتهم في طبق التقديم وانتو وذوقك والي بتحبيه
احنا بنقدمها مع بطاطس مقلية وبتنجان مقلي
وسلطة خضراء وبيبقى أحلى غداء .



باتمنى يكون موضوعي البسيط
ضاف لك حاجة جديدة.

هيفولا