[هيفولا]

المعمول بطريقة الشيف/ لطيفة

قدمت دورة (حلويات العيد)

وكانت دورة جميلة جدا واستمتعت أنا والمشاركات
واستفادو جدا جدا وفرحو انهم اتعرفو عليا ,
وزي اي حاجة اعملها في موضوع هوايتي هواية الطبخ
بحب أوثق كل حاجة بالصور
علشان تبقى مرجع ليا وتوثيق لإنجازاتي في المجال ده .

هنا في أول يوم عملت المعمول
ودي الطريقة المصورة الي وزعتها
على المشاركات علماً إني دوراتي أقصى عدد بيكون هو 7
علشان لازم الكل يعمل ويطبق قدامي
وأقدر أخد وأدي في الكلام مع كل المشاركات
عكس لو كان العدد كبير

هنا صورة مقربة لمقادير المعمول بطريقتي

ظبطت الدنيا وكنت جايبة كل حجاتي
وهنا لما بدأنا نتكلم عن المكونات والبداية

هنا بعد ما خلصنا كلام عن المكونات كلها .

بدأنا نقيس المقادير ونجهز مكونات المعمول

بإسم الله نبدأ طريقة المعمول

ح ستخدم اكواب القياس او الاكواب المعيارية
لكن ممكن تستخدمي كوباية الماية العادي
بشرط تبقى نفس مقاس الكباية لقياس كل المقادير .

المقادير :
250 جرام زبدة (كوب وربع)
1/2 كوب سكر بودرة
1/4 2 كوب دقيق فاخر منخول
1 معلقة صغيرة باكنج باودر

المكونات الاضافية :
رشة ملح
وللنكهة 1/2 ملعقة صغيرة من الفانيليا
ملاحظة
فوق في ورقة الدورة مكتوب حليب سائل 1/4 كوب ممكن
ما نستخدموش غير لو كانت العجينة مفرولة شوية
ويادوب شوية علشان زيادة بتخلي المعمول ناشف جدا

وللحشو :
وحنحتاج تمر او عجوة منزوعة النوة .
وحنضيف عليها شوية زبدة طرية ورشة قرفة ورشة فانيليا
ونعجن العجوة كويس علشان المكونات تندمج مع بعض
وبتكون الحشوة رائعة فوق الوصف
عن تجربة والكل بيسألني عن سر العجوة الجميل

وحنعملها كور صغيرة
بالصورة دي وحنخليها على جنب

وللتشكيل المعمول ح نحتاج للقوالب المعمول
ده شكل القوالب الي نازلة جديد بلاستك وفيها اكتر من شكل .
بس القديمة الاصلية بتكون خشب وفيه موديل واحد بس

هنا صوره قريبة لشكل القالب من جو وشكل الرسومات .



يتبع

[هيفولا]

طريقة عمل عجينة المعمول :

نحط الزبدة الطرية الباردة في وعاء
مع السكر البودرة ونبدأ نخفقهم





في معظم البسكويتات يفضل استخدام الزبدة الطرية البادرة
مش الطرية الي سايحة قوي
لضمان نتيجة رائعة وطعم مميز

شوفوا هنا الزبدة توزعت بس مفرولة
لو كانت الزبدة طرية كانت دوبت السكر
ودي تكه مهمة .




ومع الخفق بدأت الزبدة تندمج مع السكر




هنا مع الخفق المستمر بقت زي الكريمة




وهنا لما خفقنا اكتر بقى لونها فاتح وده المطلب




ح نضيف كمية الدقيق كلها ونبدأ نعجن بإدينا




بصو هنا في البداية بقت العجينة مفرولة بس متماسكة
وبتفرول بسهولة يعني ما تعجنتش بسرعة
وده علشان الزبدة لسه باردة بس طرية






خدت العجينة على رخامة وعجنتها
ودعتها كتير لحد ما بقت طريقة وجميلة جدا
وملمسها ناعم




وهنا لما لمتها وبقت كورة لاحظوا




وهنا للتوضيع بصو كورة ال عجينة جميلة ازاي




بصراحة بحب أنظم خطواتي وبعد ما بعجن العجينة
وبخلصها على طول في لحظتها بعملها كور
وحطها في طبق بالصوره دي


يتبع

[هيفولا]

تشكيل المعمول :

حنحتاج إلى العجين الي عملناها كور , وقالب التشكيل ,
وللحشو العجوة الي جهزناها ,
ودقيق علشان نرش شوية في القالب ,
وصواني نرص فيها

نختار اي شكل من القوالب
ونرش شوية دقيق بالصوره دي

وناخد كورة عجينة ونفردها بإدينا على شكل دائرة
ونحط في النص كورة عجوة بالصورة دي

نقفل الكورة المحشية كويس جدا
ونحطها في القالب المرشوش بالدقيق
ونضغط عليها ومش حنخاف انها لزقت
علشان رشينا الدقيق في القالب.

وح نخبط حرف القالب وحتنزل متزوقة وجميلة
حسب شكل القالب اللي اخترناه

وهنا صور للصينية اول ما خلصتها

والمقدار ده حيديكي 22 معمول حجم وسط
زي بتاعي او 15 حجم كبير .

خبز المعمول :-

والمعمول بيتخبز على حرارة هادية حوالي 130 ونحط الصاج في الرف من تحت وحياخذ 10 دقايق وبعد كده نحمر الوش علشان يبقى دهبي أسيبكم مع الصور

وده الشكل من جوه .
المعمول بقى حاجة لازم تكون موجودة على السفرة الصبح للفطار
لانو رائع وجميل وهش
ومقرمش بطريقة رهيبة ومغذية

والعجوة مع الزبدة عاملة شغل جامد جدا جدا .

لازم تجربوه

لو عجبك المعمول قولي

هيفولا